22:1
þa soðlice genealæhte freolsdæg azimorum se is gecweden eastre:
22:2
and þara sacerda ealdras and þa boceras smeadon hu hig hine forspildon; Soðlice hig adredon him þæt folc.
22:3
þa eode satanas on iudam se wæs oðre naman scarioþ. an of þam twelfum.
22:4
þa ferde he and spæc mid þara sacerda ealdormannum and duguðe ealdrum hu he hine him gesealde;
22:5
And hig fægenydun and him weddedon feoh to syllenne:
22:6
and he behet and he sohte hu he eaðelicust hine beæftan þære menego gesealde;
22:7
þa com se dæg azimorum on þam hi woldon hyra eastron gewyrcan
22:8
and he sende petrum. and iohannem and cwæð to him farað and gearwiað us þæt we ure eastron gewyrcon;
22:9
þa cwædon hig hwar wylt tu þæt we gearwion
22:10
and he cwæð to him; Nu þænne ge on þa ceastre gað eow agen yrnð an man mid wæterbuce. filigeað him on þæt hus þe he ingæð.
22:11
and secgeað þam hushlaforde; Ure lareow þe segð hwar ys cumena hus. þar ic mine eastron wyrce mid minon leorningcnihtum;
22:12
And he eow betæcð mycele healle gedæfte. gegearwiað þara;
22:13
þa ferdun hig and gemettun swa he him sæde: and hig gearwudun eastrun;
22:14
And þa tima wæs he sæt and his twelfe apostolas mid him
22:15
and he sæde him; Of gewilnunge ic gewilnude etan mid eow þas eastron ær ic forðfare;
22:16
Ic eow secge þæt ic heonon forð ne ete. ær hyt sy on godes rice gefylled;
22:17
And onfeng calice and þancas dyde and cwæð; Onfoð and dælað betwux eow:
22:18
Soðlice ic eow secge þæt ic ne drince of þises wingeardes cynne ær godes rice cume;
22:19
And he onfengc hlafe and þancude and him sealde. and cwæð; þis is min lichama. se is for eow geseald doð þis on min gemynd;
22:20
And swa eac þæne calic: syððan he geeten hæfde and cwæð; þes calic is niwe cyðnys on minum blode se bið for eow agoten;
22:21
þeah hwæðere her is þæs læwan hand mid me on mysan.
22:22
and witodlice mannes sunu gæð æ flter þam ðe him forestihtud wæs: þeah hwæðere wa þam men þe he þurh geseald bið;
22:23
And hi agunnon betwux him smeagan hwylc of him þæt to donne wære;
22:24
and hi flitun betwux him hwylc hyra wære yldest;
22:25
þa sæde he him cyningas wealdað hyra þeoda: and ða ðe anweald of er hig habbað synt fremfulle genemned:
22:26
ac ne beo ge na swa; Ac gewurðe he swa swa gingra se þe yldra ys betwux eow; And se þe forestæppend ys beo he swylce he þen Sy;
22:27
Hwæðer ys yldra þe se þe ðenað þe se ðe sitt: witudlice se ðe sitt; Ic eom on eowrum midlene swa swa se þe ðenað;
22:28
Ge synt þe mid me þurhwunedon on minum geswincum
22:29
and ic eow dihte swa min fæder me rice dihte.
22:30
þæt ge eton and drincon ofer mine mysan on minum rice and ge sitton of er þrymsetl demende twelf mægða israhel;
22:31
þa cwæð drihten: Simon simon. nu satanas gyrnde þæt he eow hridrude swa swa hwæte;
22:32
Ic gebæd for þe þæt ðin geleafa ne geteorige; And þu æt sumum cyrre gewend and tryme þine gebroðru;
22:33
þa cwæð he drihten. ic eom gearu to farenne mid þe: ge on cwertern ge on deað;
22:34
þa cwæþ he. ic secge þe petrus: ne cræwð se hana todæg ær þu me ætsæcst;
22:35
þa cwæð he to him þa ic eow sende butan seode and codde and gescy wæs eow ænig þing wana; þa cwædon hig nan þing;
22:36
þa cwæð he. ac nu se þe hæfð seod gelice nime codd: and se ðe næfð sylle his tunecan and bicge him swurd;
22:37
Soðlice ic eow secge þæt gyt scyl beon gefylled þæt be me awriten ys: and þæt he mid rihtwisum geteald wæs. witudlice þa þing þe be me synt habbað ende;
22:38
And hig cwædon. drihten: her synt twa swurd and he cwæð þæt ys genoh;
22:39
And æfter gewunan he uteode on þæne munt oliuarum þæt ys elebergena: and his leorningcnihtas him fyligdon;
22:40
And þa he com to þære stowe he sæde him: gebiddað þæt ge on costnunge ne gan;
22:41
And he wæs fram him alocen swa mycel swa is anes stanes wyrp: and gebigedum cneowum he hyne gebæd
22:42
and cwæð; Fæder gif þu wylt. afyr þysne calic fram me þeah hwæðere ne gewurðe min willa ac þin;
22:43
þa ætywde him godes engel. of heofone and hyne gestrangode and he wæs on gewinne and hine lange gebæd
22:44
and hys swat wæs swylce blodes dropan on eorðan yrnende.
22:45
and þa he of gebede aras and com to his leorningcnihtum he hig funde slæpende for unrotnesse:
22:46
and he sæde him: hwi slape ge. arisað and biddað ge on costunge ne gan;
22:47
Him þa þa gyt specendum þa com þæt wered and him toforan eode an of þam twelfum se wæs genemned iudas and he genealæhte þam hælende þæt he hine cyste;
22:48
þa cwæð se hælend iudas: mannes sunu þu mid cosse sylst;
22:49
þa gesawon þa ðe him abutan wæron þæt þær towerd wæs and cwædon. drihten: slea we mid swurde;
22:50
þa sloh hyra an þara sacerda ealdres þeow and hys swyðre eare of acerf;
22:51
þa andswarude se hælend lætað þus; and þa he æþran hys eare he hyt gehælde;
22:52
þa cwæð se hælend to þam ealdormannum and to þam witum and þæs temples ealdrum; Ge ferdon swa swa to anum sceaðan mid swurdum and mid sahlum þæt ge me gefengon;
22:53
þa ic wæs dæghwamlice on temple mid eow. ne aþenedon ge eower handa on me: ac þis is eower tid and þystra anweald;
22:54
þa namon hig hine and læddon to þæra sacerda ealdres huse: and petrus fyligde feorran;
22:55
And petrus wæs mid him onmiddan þam cafertune: þar hig æt þam fyre sæton;
22:56
þa hine geseah sum þinen æt leohte sittende and hine beheold. þa cwæð heo. and þes wæs mid him;
22:57
þa ætsoc he and cwæð. eala wif ne can ic hyne;
22:58
And þa embe lytel hine geseah oðer. and cwæð. þu eart of him; þa cwæð petrus eala mann ic ne eom;
22:59
and þa æfter lytlum fæce swylce anre tide. sum oðer seðde and cwæð; Soolice þes wæs mid him: witodlice he is galileisc;
22:60
þa cwæð petrus. eala man nat ic hwæt þu segst; And þa hig þæt spræcon samninga se hana creow:
22:61
þa drihten bewende hine and beseah to petre. þa gemunde petrus drihtnes wordes þe he cwæð: þæt ðu min ætsæcst. þriwa todæg ær se hana crawe;
22:62
þa eode petrus ut and biterlice weop:
22:63
and þa ðe þæne hælend heoldon hine bysmrodon and beoton:
22:64
and oferwrugon hys ansyne and þurhsun his nebb: and ahsodon hyne. aræd. hwylc ys. se ðe þe sloh;
22:65
And manega oðre þing hig him to cwædon dysigende;
22:66
And þa ða dæg wæs þa togædere comun þæs folces yldran and þara sacerda ealdermenn and boceras and læddon hine to hyra gemote and cwædon; Sege us gifþu sy crist;
22:67
þa cwæþ he þeah ic eow secge ge m e ne gelyfaþ.
22:68
þeh ic eow ahsige ge ne andswariað me ne ne forlætað;
22:69
Heonun forð bið mannes sunu sittende on godes mægnes swyþran healfe;
22:70
þa cwædon hig ealle. eart þu godes sunu; þa cwæð he ge secgað þæt ic eom;
22:71
And hig cwædon. hwi gyrne we gyt gewitnesse. sylfe we gehyrdon of hys muðe;