2:1

Soþlice on þam dagum wæs geworden gebod fram þam casere augusto. þæt eall ymbehwyrft wære tomearcod;

2:2

þeos tomearcodnes wæs æryst geworden fram þam deman syrige cirino.

2:3

and ealle hig eodon. and syndrie ferdon on hyra ceastre;

2:4

þa ferde iosep fram galilea of þære ceastre nazareþ: on iudeisce ceastre dauides. seo is genemned beþleem

2:5

forþam þe he wæs of dauides huse. and hirede þæt he ferde mid marian þe him beweddod wæs. and wæs geeacnod;

2:6

Soðlice wæs geworden þa hi þar wæron. hire dagas wæron gefyllede þæt heo cende.

2:7

and heo cende hyre frumcennedan sunu. and hine mid cildclaþum bewand. and hine on binne alede. forþam þe hig næfdon rum on cumena huse;

2:8

and hyrdas wæron on þam ylcan rice waciende: and nihtwæccan healdende of er heora heorda

2:9

þa stod drihtnes engel wiþ hig and godes beorhtnes him ymbelscean: and hi him mycelum ege adredon.

2:10

and se engel him to cwæð; Nelle ge eow adrædan. soþlice nu ic eow bodie mycelne gefean. se bið eallum folce.

2:11

forþam todæg eow ys hælend acenned. se is drihten crist on dauides ceastre;

2:12

And þis tacen eow byð; Ge gemetað an cild hreglum bewunden. and on binne aled;

2:13

And þa wæs færinga geworden mid þam engle mycelnes heofonlices werydes god heriendra. and þus cweþendra;

2:14

Gode sy wuldor on heahnesse and on eorðan sybb mannum godes willan;

2:15

and hit wæs geworden þa ða englas to heofene ferdon. þa hyrdas him betwynan spræcon and cwædon; Utun faran to beþleem. and geseon þæt word þe geworden is. þæt drihten us ætywde;

2:16

and hig efstende comon: and gemetton marian and iosep and þæt cild on binne aled;

2:17

þa hi þæt gesawon þa oncneowon hig be þam worde þe him gesæd wæs be þam cilde;

2:18

And ealle þa ðe gehyrdon wundredon be þam þe him þa hyrdas sædon;

2:19

Maria geheold ealle þas word on hyre heortan smeagende;

2:20

þa gewendon ham þa hyrdas god wuldriende and heriende on eallum þam ðe hi gehyrdon. and gesawon; Swa to him gecweden wæs:

2:21

Efter þam þe ehta dagas gefyllede wæron þæt ðæt cild emsnyden wære. his nama wæs hælend; Se wæs fram engle genemned: ær he on innoðe geeacnod wære;

2:22

and æfter þam þe hyre clænsunge dagas gefyllede wæron. æfter moyses æ. hi læddon hyne on hierusalem þæt hi hine gode gesettun

2:23

swa swa on drihtnes æ. awriten is; þæt ælc wæpned gecyndlim: ontynende. byð drihtne halig genemned;

2:24

And þæt hig offrunge sealdon æfter þam þe drihtnes æ. gecweden is. twa turtlan. oððe twegen culfran briddas.

2:25

and þa wæs an man on hierusalam þæs nama wæs simeon and þes man wæs rihtwis and oþ israhela frofor geanbidiende. and hali gast him on wæs.

2:26

and he andsware fram þam halegan gaste onfeng. þæt he deað ne gesawe. buton he ær drihten crist gesawe;

2:27

And on gaste he on þæt tempel com. and þa his magas læddon þone hælend. þæt hig for him æfter þære æ gewunan dydon.

2:28

he onfeng hine mid his handum: and god bletsode and cwæð;

2:29

Drihten. nu þu lætst þinne þeow æfter þinum worde on sibbe;

2:30

Forðam mine eagan gesawon þine hæle.

2:31

ða þu geearwodest beforan ansyne eallra folca;

2:32

Leoht to þeoda awrigenesse and to þines folces wuldre israhel:

2:33

þa wæs his fæder and his modor wundriende be þam þe be him gesæde wæron;

2:34

And þa bletsude hig simeon and cwæþ to marian his meder; Loca nu þes is on hryre. and on æryst asett manegra on israhel. and on tacen þam ðe wiðcweden byð;

2:35

And his swurd þine sawle þurhfærð. þæt geþohtas syn awrigene of manegum heortum;

2:36

And anna wæs witegystre fanueles dohtor of asseres mægðe þeos wunude manigne dæg. and heo leofode mid hyre were seofan ger of hyre fæmnhade.

2:37

and heo wæs wudewe oð feower and hundeahtatig geara; Seo of þam temple ne gewat. dæges and nihtes þeowigende on fæstenum and on halsungum;

2:38

And þeos ðære tide becumende drihtne andette and be him spræc eallum þam þe geanbidedon hieru salem alysednesse;

2:39

And þa hi ealle þing gefyldon: æfter drihtnes æ hi gehwurfon on galileam on heora ceastre nazareþ;

2:40

Soðlice þæt cild weox and wæs gestrangod wisdomes full. and godes gyfu wæs on him.

2:41

and his magas ferdon ælce gere to hierusalem on easterdæges freolstide.

2:42

and þa he wæs twelf wintre hy foron to hierusalem to þan easterlican freolse æfter hyra gewunan.

2:43

And gefylledum dagum þa hig agen gehwurfon. belaf se hælend on hierusalem. and his magas þæt nyston.

2:44

wendon þæt he on heora gefere wære. þa comon hig anes dæges fær: and hine sohton betux his magas and his cuðan.

2:45

ða hig hyne ne fundon hig gewendun to hierusalem hyne secende;

2:46

þa æfter þrim dagum hig fundon hine on þam temple sittende onmiddan þam lareowum. hlystende and hi ahsiende;

2:47

þa wundrodon hig ealle þe gehyrdon be his gleawscipe: and hys andswarum;

2:48

þa cwæð his modor to him; Sunu hwi dydest þu unc ðus. þin fæder and ic sarigende þe sohton;

2:49

þa cwæð he to him. hwæt is þæt gyt me sohton: nyste gyt þæt me gebyrað to beonne on þam ðingum ðe mines fæder synt;

2:50

þa ne ongeton hig þæt word þe he to him spræc;

2:51

þa ferde he mid him and com to nazareþ. and wæs him underþeod; And his modor geheold ealle þas word on hyre heortan smeagende;

2:52

And se hælend þeah on wisdome and on ylde. and mid gyfe. mid gode and mid mannum