10:1

Efter þam sæ hælend gemearcude oðre twa and hundseofantig and sende hig twam beforan his ansyne. on ælce ceastre. and stowe þe he to cumenne wæs:

10:2

and cwæð to him her is mycel rip. and feawa wyrhtan: biddað þæs ripes hlaford þæt he sende wyrhtan to his ripe;

10:3

Farað nu: nu ic eow sende swa swa lamb betwux wulfas;

10:4

Ne bere ge sacc. ne codd. ne gescy. ne nanne man be wege ne gretað;

10:5

On swa hwylc hus swa ge ingað: cweðaþ æryst: sib si þisse hiwræddenne;

10:6

And gyfþar beoð sybbe bearn. reste þar eower sib: gif hit elles sy. heo sy to eow gecyrred;

10:7

Wunigað on þam ylcan huse: and etað and drincað þa þing þe hig habbað; Soðlice se wyrhta is his mede wyrðe; Ne fare ge fram huse to huse.

10:8

ac on swa hwylce ceastre swa ge ingað and hig eow onfoð: etað þæt eow toforan aset ys.

10:9

and gehælað þa untruman þe on þam huse synt. and secgað him. godes rice to eow genealæcð.

10:10

on swa hwylce ceastre swa ge ingað: and hig ne onfoð eow gaþ on hyra stræta and cweðaþ;

10:11

þæt dust þæt of eowre ceastre on urum fotum clifode. we drigeaþ on eow. witað þeah þæt godes rice genealæcð;

10:12

Ic eow secge þæt sodomwaron on þam dæge bið forgyfenlicre þonne þære ceastre;

10:13

Wa þe corozam: wa þe beþsaida: forþam gif on tyro and on sidone gewordene wæron þa menegu þe on eow gedone synt: gefyrn hig on hæran and on axan hreowsunge dydon;

10:14

þeah hwæþere tiro and sydone on þam dæge byð forgyfenlicre þonne eow;

10:15

And þu cafarnaum oð heofon up ahafen: þu byst oþ helle gesenced;

10:16

Me gehyrð se ðe eow gehyrð: and me oferhogaþ se ðe eow oferhogað; Se þe me oferhogað. he oferhogað þæne þe me sende;

10:17

þa gecyrdon þa twa and hundseofantig mid gefean and cwædon; Drihten deofolseocnessa us synt on þinum naman underþeodde;

10:18

þa sæde he him. ic geseah satanan swa swa ligræsc of heofone feallende:

10:19

and nu ic sealde eow anweald to tredenne ofer næddran. and snacan and of er ælc feondes mægen: and nan þing eow ne derað;

10:20

þeah hwæðere ne blissige ge on þam þe eow synt gastas underþeodde; Geblissiað þæt eower naman synt on heofonum awritene;

10:21

On þære tide he on halgum gaste geblissode and cwæð; Ic andete þe fæder. drihten heofones and eorðan. forþam þe ðu þas ðing wisum and gleawum behyddest. and lytlingum awruge. forþam hit beforan þe swa gelicode;

10:22

Ealle þing me synt fram minum fæder gesealde: and nan man nat hwylc is se sunu buton se fæder: ne hwylc si ðe fæder buton se sunu: and se ðe se sunu hit awreon wyle;

10:23

þa cwæþ he to his leorningcnihtum bewend; Eadige synt þa eagan þe geseoð þa ðing þe ge geseoð;

10:24

Soðlice ic eow secge þæt manega witegan and cyningas woldon geseon þæt ge geseoþ and hig hit ne gesawon. and woldon gehyran þæt ge gehyrað. and hig hit ne gehyrdon;

10:25

þa aras sum æ. glæw man. and fandode his and cwæð; Lareow. hwæt do ic þæt ic ece lif hæbbe;

10:26

þa cwæþ he to him: hwæt is gelwriten on þære æ. hu rætst þu;

10:27

þa andswarude he lufa drihten þinne god of ealre þinre heortan. and of ealre þinre sawle: and of eallum þinum mihtum and of eallum þinum mægene. and þinne nehstan swa ðe sylfne;

10:28

þa cwæð he. rihte þu andswarodest. do þæt. þonne leofast þu;

10:29

þa cwæþ he to þam hælende. and wolde hine sylfne gerihtwisian; And hwylc is min nehsta;

10:30

þa cwæþ se hælend hine up beseonde; Sum man ferde fram hierusalem to hiericho and becom on þa sceaðan. þa hine bereafodon; and tintregodon hine: and forleton hine samcucene:

10:31

þa gebyrode hit þæt sum sacerd ferde on þam ylcan wege and þa he þæt geseah he hine forbeh.

10:32

and eallswa se diacon. þa he wæs wið þa stowe and þæt geseah he hyne eac forbeah;

10:33

þa ferde sum samaritanisc man wið hine: þa he hine geseah þa wearð he mid mildheortnesse of er hine astyred

10:34

þa genealæhte he and wrað his wunda and on aget ele and win. and hine on hys nyten sette and gelædde on his læcehus: and hine lacnude

10:35

and brohte oðrum dæge twegen penegas and sealde þam læce: and þus cwæð; Begym hys. and swa hwæt swa þu mare to gedest: þonne ic cume ic hit forgylde þe;

10:36

Hwylc þara þreora þincð þe þæt sy þæs mæg. þe on ða sceaðan befeoll;

10:37

þa cwæð he. Se þe him mildheortnesse on dyde; þa cwæþ se hælend ga. and do eallswa;

10:38

Soðlice hit wæs geworden þa hig ferdon. se hælend eode on sum castel and sum wif on naman marþa onfeng hyne on hyre hus.

10:39

and þære swustur wæs maria seo eac sæt wið þæs hælendes fet and his word gehyrde;

10:40

Soþlice marþa geornlice him þenode; þa stod heo and cwæþ: drihten. nis þe nan caru þæt min swustur let me ænlipie þenian sege hyre þæt heo fylste me;

10:41

þa cwæþ se hælend: marþa marþa: geornfull þu eart and embe fela þinga gedrefed;

10:42

Gewislice an þing is niedbehefe: maria geces þæne selestan dæl se hyre ne byð afyrred;